O Barrio

Neste mes de abril naceu en Canido “O Barrio”, un boletín de edición mensual que ten coma obxectivo achegar as novas que acontecen na nosa contorna máis próxima. 

O boletín editado pola AV de Canido en colaboración coas entidades ASC Muíño do Vento e FerrolTerra Antiga, terá ampla información sobre o que  aconteza, así como daquelas outras actividades, eventos, exposicións, palestras, que se organicen e que poidan ser interese para a veciñanza. Pódese atopar o boletín nos distintos establecementos comerciais de Canido e é totalmente gratuíto.

O que busca “O barrio” é recuperar a comunicación física coa veciñanza especialmente coa de maior idade que moitas veces sofren unha barreira de entrada por mor da fenda dixital e o seu acceso as redes sociais. Por outra banda, co boletín abrimos unha nova canle de expresión para os veciños e veciñas do barrio, contando cunha sección específica no “Cóntanolo Ti”, no que a veciñanza pode facer achegas con textos, fotografías, opinións ou peticións. Este boletín está feito con vocación aberta e participativa.